অসমীয়া ক্লাব তেজপুৰৰ এক ব্যতিক্ৰমী অগ্ৰনী সামাজিক, সাংস্কৃতিক অনুষ্ঠান । অসমীয়া লোকৰ অৱসৰ বিনোদনৰ বাবে ১৯১৫ চনৰ ১৫ এপ্ৰিল (১ ব'হাগ)ত অসমীয়া ক্লাব প্ৰতিষ্ঠা হয় । তেজপুৰক গৰিমামন্দিত কৰি ৰখা বহু অনুষ্ঠান প্রতিষ্ঠানৰ ভিতৰত অনন্য কৰ্মৰাজিৰে অসমীয়া ক্লাব অন্যতম । তেজপুৰৰ কিছুস্ংখ্যক স্বনামধন্য লোকৰ উদ্যোগত আৰু সাহিত্যকান্দাৰী পদ্মনাথ গোহঞি বৰুৱাৰ নেতৃত্বত অসমীয়া ক্লাব প্ৰতিষ্ঠা হয় । অসমীয়া ক্লাবৰ প্রতিষ্ঠাপক সভাপতি আছিল হৰিবিলাস আগৰৱালা, প্রতিষ্ঠাপক সম্পাদক আছিল পদ্মনাথ গোহঞি বৰুৱা আৰু প্রতিষ্ঠাপক মুখ্য পৃষ্ঠপোষক আছিল যোগেন্দ্ৰনাথ বৰুৱা । অসমীয়া ভষা-সাহিত্য আৰু সংস্কৃতিৰ প্ৰাণকেন্দ্ৰ – তেজপুৰত ১৯১৫ চনৰ ১৫ এপ্ৰিল (১ ব'হাগ) ত অসমীয়া ক্লাব প্ৰতিষ্ঠা হোৱাৰ আগতেই আন কেইটামান অনুষ্ঠান তেজপুৰত প্ৰতিষ্ঠা হৈছিল । ১৮৯০ চনৰ ২৩ নবেম্বৰ তাৰিখে লম্বোদৰ বৰাদেৱে তেখেতৰ কলিবাৰীৰ বাসগৃহত অসমীয়া ভাষা উন্নতি সাধিনী সভা প্ৰতিষ্ঠা কৰে । সেই অনুষ্ঠানৰ এখন সাধৰণ সভাত সভাপতি স্বৰ্গীয় ৰায় চাহাব ভবানী চৰণ ভট্টাচাৰ্যৰ সভাপতিত্বত সভাৰ নামঘৰ আৰু থিয়েটাৰ ষ্টেজ নিৰ্মাণৰ বাবে এখন সমিতি গঠন কৰাৰ প্ৰস্তাৱ গ্ৰহণ কৰি এখন চম্ভালন সমিতি গঠনৰ কাম আৰম্ভ কৰা হয় । কিন্তু তেজপুৰৰ স্থানীয় ব্যক্তিসকলক (তেজপুৰীয়া) আৰু অইন ঠাইৰ পৰা আহি তেজপুৰত বাস কৰা ব্যক্তিসকলক (নন্-তেজপুৰীয়া) কেনেদৰে সমিতিৰ সভ্য নিৰ্বাচন কৰা হব সেই লৈ এক অবাঞ্চনীয় পৰিস্থিতিৰ উদ্ভৱ হয় । এই অচলাৱস্থা আঁতৰ কৰা উদ্দেশ্যৰে পদ্মনাথ গোহাঞি বৰুৱা ডাঙৰীয়াই অসমীয়া মানুহৰ অৱসৰ বিনোদনৰ বাবে এখন সন্ধিয়া সন্মিলনী প্ৰতিষ্ঠা কৰে ৷ এই সন্ধিয়া সন্মিলনী পাছলৈ অসমীয়া ক্লাব নামেৰে নামাকৰণ কৰা হয় ৷